بەسەدان پیاو سێكسیان لەگەڵ كردم، بەبێ ئەوەی یەك فلس بە من بدرێت PDF چاپی بکه ئیمه‌یل
20216 جار بینراوه
شه‌ممه‌, 27 ئۆگستی 2011 11:46

ژنێك دوای ئەوەی دوو ساڵ لەماڵێك لەشفرۆشی پێدەكرێت، لەماڵەكە رادەكات و پۆلیسیش خاوەن ماڵەكە دەسگیر دەكات

لەو كاتەوەی ئێمە لەوێ دانیشتبووین، چەند جارێك لەپێش ئەفسەرەكە قسەی خۆی گۆڕی، لەپاشا بەهەردوو دەستی لەچكێكی ماكسییەكەی بڵندكردو گوتی "دە بزانە گەورەم، چۆن بەشەق و قایش لێدان، لێیان دەدام تاكاری لەشفرۆشی بكەم". كاتێكیش ئەفسەرەكە ویستی ناوی راستەقینەی بزانێت؟ بەهێمنی و وەك زۆربەی زۆری ئافرەتە لەشفرۆشەكان، لەبەردەم ئەفسەری لێكۆڵینەوە جاری یەكەم گوتی (خ- ە) و دواتریش گوتی "نەخێر گەورەم ناوم ی- ە دواتریش پاش زەردەخەنەیەك گوتی، ناوی راستەقینەم (ك- ە) بەڵام لەخۆشەویستیان ئەو ناوانەی پێشوویان لێناوم!".
ك، ئافرەتێكی بەژن و باڵا رێكی لەدایكبووی ساڵی 1984ی شاری سلێمانییە، وەك خۆی دەڵێت "تا پۆلی پێنجەمم خوێندووە، پاشان لەتەمەنێكی بچوك بەشوو دراوم"، بەدەنگە خەمبارەكەی خۆی، دەستیكرد بەگێڕانەوەی چیرۆكی خۆی و گوتی "كێشەكانم لەوكاتەوە دەستیپێكرد كاتێك لەرێگای دراوسێكەمانەوە پیاوێك بووە ناسیاوی خانەوادەكەم، پاشانیش پیاوەكە هاتە خوازبێنیم و ئینجا بەرەزامەندی خانەوادەكەم شووم پێكرد"، دەڵێت "تا ئەو كاتەی منداڵێكیشمان بوو، هیچ گرفتمان نەبوو، بەڵام دواتر بۆ ماوەیەك كێشە كەوتە نێوان من و هاوسەرەكەم و دواتر كێشەكە بەتەڵاق كۆتایی پێهات و ماڵی باوكیشم ناڕازی نەبوون كچۆڵەكەم بەخێو بكەم، بۆیە منیش، شەوێك بەبێ ئاگاداری خانەوادەكەم، ماڵی باوكم جێهێشت و هاتمە نێو یەكەمین قۆناغی ئەو كارەم".
ك، درەنگانێكی شەو، پاش ئەوەی ماڵی باوكی جێدەهێڵێ، لەسەر شەقام تاكسییەك رادەگرێ، لەدوای سەركەوتن و پرسیاركردن، خاوەن تاكسییە دەیباتە ماڵی خوشكێكی خۆی تا وەك خزمەتكار لەوێ ئیش بكات، (ك) لەبارەی ئەو ماڵە دەڵێت "بۆ چەند رۆژێك لەو ماڵە مامەوە، تا رۆژێك شوفێری تاكسییەكە لەگەڵ ئافرەتێكی دیكە كە خوشكی بوو، داوایان لێكردم لەگەڵ پیاوێك رابوێرم، هەرچەندە هەوڵی زۆرم دا، رازی نەبم، بەڵام بەهۆی ئەوەی هیچ شوێنێكم نەبوو رووی تێبكەم، ناچار بووم خۆم بخەمە ژێر رەحمەتی ئەو پیاوە كە دواجار بۆ ماوەی دوو ساڵ بووە موشتەرییەكی بەردەوامم"، ئەو ژنە لەشفرۆشە بەپێكەنینەوە دەشڵێت "خۆشییەكەی ئەو پیاوە لەوەبوو، هەمووجار پاش ئەوەی لەگەڵم رایدەبوارد، بەزەییەوە پێمی دەگوت، بۆ واز لەكاری لەشفرۆشی ناهێنی، تامنیش جارێكی دیكە سێكسی ناشەرعی نەكەم".
لەبارەی ئەم ماڵەی كە كاری لەشفرۆشی تێدا دەكرد، (ك) زیاتر دەڵێت "بۆ ماوەی دووساڵ لەو ماڵە مامەوەو بەسەدان پیاو سێكسیان لەگەڵ كردم، بەبێ ئەوەی یەك فلس بەرامبەر ئەوكارە وەرگرم، چونكە خاوەن ماڵ دەیگوت من نەبم دەتكوژن و لەسەر شەقام دەكەوی"، لەبارەی چۆنیەتی توشنەبوونیشی بەهیچ نەخۆشییەك لەماوەی ئەو دوو ساڵە، ئەو ژنە گوتی "ئەو خوشك و برایەی ئێمەیان دەبرد بۆ پیاوەكان، لەدوو مانگ جارێك دەیانبردین بۆ لای دكتۆرێكی ئافرەتان، تا پشكنینمان بۆ بكات، چونكە زۆر مەترسی نەخۆشیمان لێدەكرا، لەبەر ئەوەی كڕیارەكان جۆراجۆر بوون و زۆریش بوون".
سەبارەت بەوەش كە لەماوەی ئەو دوو ساڵەی لەو ماڵە كاری لەشفرۆشی كردووە، هیچكات رووبەڕووی توندوتیژی نەبۆتەوە؟ كەمێك بێدەنگ بوو و دواتر گوتی "ئەو ئافرەتەی ئێمەی ئیش پێدەكرد، ئەوەندە زاڵم بوو، تەنانەت كە مانگانە خوێنیشمان دەبینی (عادە) بەزۆر پاكمانی دەكردەوەو تەسلیمی پیاوێكی دیكەی دەكردین، بەبێ ئەوەی یەك فلسم پێبدات"، دەشڵێت "بێجگە لەوەش خاوەن ماڵەكە بەزۆر حەبی منداڵنەبوونی پێدەداین". بەپێكەنینەوە گوتیشی "لەماوەی ئەو دوو ساڵەی لای ئەو ئافرەتە كاری لەشفرۆشیم كرد، دەیەها پیاوم بینی كە چەندە بۆ كاری ناشەرعی تەنازول دەكەن". جگە لە (ك) چەند ئافرەتێكی دیكەش لەو ماڵە كاری لەشفرۆشیان كردووە، لەبارەی ئەوانیشەوە (ك) دەڵێت "جگە لەمن چەند ئافرەتێكی دیكەش لەوێ بوون، بەڵام ئەوان بەس بەتەلەفۆن بۆ ماڵان رەوانە دەكران یان موشتەریان بۆ پەیدا دەكرا".
ئەو ژنە لەشفرۆشە دەشڵێت "خاوەن ماڵەكە بەهۆی بەكرێ دان و ئیشپێكردنی ئێمە، بەماوەی دووساڵ بووە خاوەن دوو خانووی زڵ لەدوو گەڕەكی زۆر راقی، بێجگە لەوەش خۆی و مێردەكەی و براكەی بەئۆتۆمبێلی خۆیان ئێمەیان بۆ پیاوان دەبرد".
لەبارەی ئافرەتەكانی دیكەش (ك) زیاتر قسەی كردو گوتیشی "ئافرەتەكان چەند جۆرێك بوون، هەندێك لەئەوان پێیان دەگوتن فول مواسەفات، هەندێكی دیكەش وەك ئێمەمانان ئەگەر هیچ لەو فول مواسەفاتانە لەوێ نەبووان ئەوا ئێمەیان ئیش پێدەكرد". لەماوەی ئەو دووساڵەی لەو ماڵە بووە، ئەو ژنە وەك خۆی هێمای بۆ دەكات، تەواوی شێوازی جلوبەرگ لەبەركردنی گۆڕاوەو دەڵێت "بۆ ئەوەی لەشولارم جوانتر بێت، خاوەن ماڵەكە لەچەند شوێنێكی لەشم تاتۆی بۆ كردم و ماكسی تەسك و تراكسودی تەسكی بۆ دەكڕیم تا موشتەریەكانی زۆرتر بن و ئێمەش ببینە فول مواسەفات، بۆ هەر موشتەرییەك 75 هەزار دیناری وەردەگرت و بۆ تبیاتەش بۆ ئەوانەی تابەیانی لەگەڵ پیاوان دەمانەوە 100 دۆلار تا 200 دۆلاری وەردەگرت، نەشیدەهێشت موشتەرییەكانم بەخشیش بدەن بە من".
سەبارەت بەپەشیمانبوونەوەشی لەو كارەی كردوویەتی، دەڵێت "باوەڕبكەن كە تازە چوبوومە لای ماڵی ئەو ئافرەتە، رۆژانە پازدە تا بیست پیاو دەهاتنە لام، بەڵام بۆ رۆژی دواتر پەشیمان دەبوومەوەو دەستم بەنوێژ و تۆبەكردن دەكرد، كەچی بۆ شەوەكەی دووبارە ناچاریان دەكردم دەست بەو ئیشە خراپە بكەمەوە"، دەشڵێت "لەماوەی ئەم دوو ساڵەی لەو ماڵە بووم، سەرەتاكەی موشتەرییەكی زۆر زۆرم هەبوو، كەچی كە كۆن بووم موشتەرییەكانم زۆر كەم بوون، بێجگە لەو پیاوەی كە ماوەی دوو ساڵ موشتەری بەردەوام بوو و هەمیشەش پاش رابواردن لەگەڵم پێمی دەگوت واز لەم ئیشە بێنە، چونكە گوناهە"، لەبارەی چۆنیەتی راكردنیشی لەو ماڵە، (ك) بەسەر بادانەوە، گوتی "ئەو رۆژەی رامكرد، دووەم رۆژی مانگی رەمەزان بوو، بڕیارمدا بۆ دواجار تۆبە بكەم، هەرچەندە پێش منیش خاوەن ماڵ دەستی بەنوێژكردن و پاڕانەوە كردبوو، هەمیشەش بەئێمەی دەگوت كە نابێت مانگی رەمەزان ئەو ئیشە خراپە بكەین"، بۆیە وەكو (ك) دەڵێت "رۆژێك بەیانییەكەی زۆر زوو بەفورسەتم زانی كە رابكەم، لەسەر دیواری ماڵەكە خۆم فڕێ دا ماڵێكی دراوسێمان و ئەوانیش پاش خزمەتكردنێكی زۆر و مانەوەم بۆ ماوەی چەند رۆژێك، منیان هێنایە بەڕێوەبەرایەتی بەدواداچوونی توندوتیژی دژ بەئافرەتان"، دەشڵێت "هەرچەندە سەرەتا گوتم نەبادا ئەوانیش وەك شوفێری تاكسییەكە توشی كاریكی خراپترم بكەن، بەڵام من ئێستا لەچاكەیان دەرناچم، چونكە لەو جەهەنەمەیان رزگار كردم".
نەقیب ژیلەمۆ عەبدولقادر، بەڕێوەبەری بەدواداچوونی توندوتیژی دژ بەئافرەتان لەهەولێر، سەبارەت بەو ئافرەتە دەڵێت "پاش ئەوەی قسەكانی ئەو ئافرەتەمان وەرگرت، بەبڕیاری دادوەر، خاوەن ماڵەكەمان دەستگیركرد، ئێستاش ئەو ئافرەتە دەبەینە شوێنێك كە تێیدا گیانی پارێزراو بێت، چونكە وەك خۆی گوتی، ئەو هەڕەشەی ماڵی باوكی لەسەرە

سه رچاوه: سڤیل

 

 

بەسەدان پیاو سێكسیان لەگەڵ كردم، بەبێ ئەوەی یەك فلس بە من بدرێت
 
.
.

.

.
.
.
.
.
.

کۆمه ڵێک وێنه ی نوێ ته ماشابکه ن

 

----------------

کۆمه ڵێک به سته ری به سوود



به ڕێوه به ری گشتی ماڵپه ڕ
سۆران شاره زووری